ໄພຂົ່ມຂູ່ຕ່າງໆໂດຍລັດຖະບານ ກຳປູເຈຍ ທີ່ຈະດຳເນີນການທາງກົດໝາຍຕໍ່ບັນດານັກຂ່າວ ແມ່ນກຳລັງເພີ່ມຂຶ້ນ, ຈົນກໍ່ໃຫ້ເກີດຄວາມເປັນຫ່ວງ ກ່ຽວກັບ ການຈຳກັດເສລີພາບໃນການນຳສະເໜີຂ່າວ, ກ່າວໂດຍລາຍງານປະຈຳປີໂດຍສະມາຄົມນັກຂ່າວຂອງກຳປູເຈຍ ຫຼື CamboJa.
ກຸ່ມດັ່ງກ່າວໄດ້ຕິດຕາມເຫດການຕ່າງໆ ກ່ຽວກັບ ການຮາວີລົບກວນ ແລະ ການຫ້າມຕໍ່ບັນດານັກຂ່າວ. ການກົດດັນຕໍ່ສື່ມວນຊົນອິດສະຫຼະ ແມ່ນໄດ້ເພີ່ມຂຶ້ນນັບຕັ້ງແຕ່ລັດຖະບານຂອງອະດີດນາຍົກລັດຖະມົນຕີ ຮຸນ ເຊັນ ໄດ້ເລີ່ມປາບປາມຜູ້ທີ່ຄັດຄ້ານທາງການເມືອງກ່ອນການເລືອກຕັ້ງ ປີ 2018. ສື່ມວນຊົນອິດສະຫຼະຫຼາຍແຫ່ງ ແມ່ນໄດ້ປິດລົງນັບຕັ້ງແຕ່ນັ້ນມາ, ແລະ ໃບອະນຸຍາດສື່ມວນຊົນ 6 ໃບ ໄດ້ຖືກຖອນໃນປີ 2023, ທຽບໃສ່ສອງກໍລະນີ ໃນປີ 2022.
ໃນ “ລາຍງານສະຖານະການການນຳສະເໜີຂ່າວຂອງກຳປູເຈຍ ປີ 2023,” ທີ່ຖືກເປີດເຜີຍ ໃນວັນທີ 20 ມີນາ ທີ່ຜ່ານມາ, CamboJa ໄດ້ບັນທຶກ 35 ກໍລະນີຂອງການຮາວີລົບກວນຕໍ່ນັກຂ່າວ 54 ຄົນ, 8 ຄົນໃນນັ້ນ ແມ່ນແມ່ຍິງ.
ການດຳເນີນການທາງກົດໝາຍປະກອບມີ 15 ຈາກ 32 ກໍລະນີ. ທີ່ວ່ານີ້ ລວມມີການຟ້ອງຮ້ອງ, ການຖອນໃບອະນຸຍາດ, ການຈັບກຸມ ຫຼື ຂົ່ມຂູ່ດຳເນີນການທາງກົດໝາຍ. ນັກຂ່າວຢ່າງໜ້ອຍ 5 ຄົນຖືກຟ້ອງຮ້ອງ, ຖືກຕັ້ງຂໍ້ຫາອາຊະຍາກຳ ຫຼື ຖືກຂັງຄຸກ.
ລາຍງານໄດ້ກ່າວວ່າ “ພວກເຮົາລະມັດລະວັງຕໍ່ການສະຫຼຸບທີ່ແນ່ນອນຈາກຕົວເລກທີ່ວ່ານີ້,” ໂດຍກ່າວຕື່ມວ່າ ນັກຂ່າວບາງຄົນ “ແມ່ນມີຄວາມເຂົ້າໃຈວ່າ ບໍ່ກ້າທີ່ຈະລາຍງານຂ່າວ ຍ້ອນຢ້ານວ່າ ຈະຖືກແກ້ແຄ້ນເພີ່ມເຕີມ.”
ຟໍຣັມສະແດງຄວາມຄິດເຫັນ